ദോഹ: വന്യജീവി സംരക്ഷണ നിയമങ്ങൾ കർശനമായി നടപ്പിലാക്കുന്നതിനായി ഖത്തർ പരിസ്ഥിതി, കാലാവസ്ഥാ വ്യതിയാന മന്ത്രാലയത്തിന്റെ വന്യജീവി സംരക്ഷണ വിഭാഗം, ആഭ്യന്തര സുരക്ഷാ സേനയായ ലഖ്വിയയുടെ പരിസ്ഥിതി സുരക്ഷാ യൂണിറ്റുമായി സഹകരിച്ച് രാജ്യത്തിന്റെ തെക്കൻ പ്രദേശങ്ങളിൽ വ്യാപകമായ പരിശോധനാ ക്യാമ്പെയ്‌ൻ നടത്തി.
പരിശോധനയ്ക്കിടെ ഏകദേശം 474 പക്ഷി ആകർഷണ ഉപകരണങ്ങൾ (സൗണ്ട് ല്യൂറുകൾ) പിടിച്ചെടുത്തു. പരിസ്ഥിതി നിയമങ്ങൾക്കും ചട്ടങ്ങൾക്കും അനുസരിച്ച് ആവശ്യമായ നിയമനടപടികൾ ആരംഭിച്ചതായും അധികൃതർ അറിയിച്ചു.
പക്ഷികളെ വലവീശി പിടിക്കാനോ ആകർഷിക്കാനോ ഉപയോഗിക്കുന്ന ഈ ഇലക്ട്രോണിക് ഉപകരണങ്ങൾ ജൈവ വൈവിധ്യത്തെയും വന്യജീവി ആവാസവ്യവസ്ഥകളെയും ഗുരുതരമായി ബാധിക്കുന്നുവെന്ന് മന്ത്രാലയം മുന്നറിയിപ്പ് നൽകി.
പരിസ്ഥിതിനിയമങ്ങൾ കൃത്യമായി പാലിക്കുകയും വന്യജീവികൾക്ക് ഹാനികരമായ രീതികൾ ഒഴിവാക്കുകയും ചെയ്യേണ്ടത് എല്ലാ പൗരന്മാരുടെയും താമസക്കാരുടെയും ഉത്തരവാദിത്വമാണെന്ന് മന്ത്രാലയം ഓർമ്മിപ്പിച്ചു.
പരിസ്ഥിതി സംരക്ഷണവും ഖത്തറിന്റെ പ്രകൃതിദത്ത സമ്പത്തുകളുടെ നിലനിൽപ്പും ഉറപ്പാക്കുന്നതിനായി ഇത്തരം പരിശോധനാ നടപടികൾ തുടരുമെന്നും അധികാരികൾ വ്യക്തമാക്കി.
